సెరెండిపిటి

నేను సిద్ధమయ్యే సరికి ముగిసింది యుద్ధం

విఫలం అనుకున్నప్పుడు తట్టింది విజయం

నా అన్న వారు వెన్నంటి వుంటారు

అనుకున్న తక్షణం నా వెంట లేరెవరు

కన్నీటి వాగు ఎండిపోతున్నప్పుడు

వెక్కి ఏడ్చేందుకు 

తూలి వాల్చేందుకు 

విన్నాను ఓ తెలియని భుజం చప్పుడు

అణువణువూ ద్వేషించాలనుకున్నప్పుడు

వినవచ్చింది ఒక నిజ లయ గుప్పెడు

వెలుగు రేఖ కోసం వేచి చూసినప్పుడు

చూస్తూ చూస్తూ రెప్ప వాల్చినప్పుడూ

అరుణ కాంతి కిరణ తోరణం నా ఆవరణం

అదే కదా జీవితం

అలా కదా జీవనం

రేపటికి నువ్వు సిద్ధం 

నీకు రేపు వుంచిందే నిక్షిప్తం 

నేటికి నీకూ తెలియదు

రేపటికి నిన్నా తెలీదు

విజయంతో నీవు లోకానికి పరిచయం

అపజయంలో నీకు లోకం పరిచితం

కానీయి సదా సంతసమే నీ సంతానం

తుది మరపూ కారాదు 

మెరుపు మురుగూ కాలేదు

అంచు ఇంచు

కొంగు పొంగు 

నేల అడుగు

నింగి తొడుగు

కానీయి సదా వసంతమే నీ సంతకం

..........................................