వేరూ చిగురూ వేరు

*
అ/ఆ

నీ కన్నుల్లో  నా అచంచల స్వప్నం
నా చూపుల్లో నీ చేలాంచల లోకం
నీ కదలికలో నా తడబడని ఛాయా
నా అడుగుల్లో నీ నిశ్చిత గమ్యం
వుండేది నిన్నా
అది నేడు  లేదే
ఎందుకో
*
ఆ/అ

నీ కలయికలో దాగిన ఎడబాటు
నీ మాటల్లో రేగిన  లోటు
నీ మౌనాల్లో కానని దూరాలు
నీ ఊసుల్లో తేలని భారాలు
వున్నాయి నేడు
అవి నిన్న లేవే
ఎందుకో
*
అ/ఆ

నీ రాకల్లో పసి హేమంతం
నీ కౌగిలిలో వసి వసంతం
నీ కన్నుల్లో నా దాచిన కన్నీరు
నీ కనుపాపల్లో నా సాచిన సౌష్టవం
వుండేవి నిన్నా
అవి నేడు లేవే
ఎందుకో
*
ఆ/అ

నీ నడకల్లో మార్మిక వీడ్కోలు
నీ బాసల్లో ధార్మిక శిశిరాలు
నీ ప్రేమల్లో వెలిసిన గోడలు
నీ మోహాల్లో  మొలిచిన నీడలు
వున్నాయి నేడు
అవి నిన్న లేవే
ఎందుకో

...........................
మణికొండ, మే 25, 15

*అ = అతడు, ఆ = ఆమె

మిస్సింగ్

 లోకాన
వాంఛలెరుగక
కలయ తిరిగాడు బైరాగిలా
గుంపుల్లో  పిపాసిలా
ఏకాకి తనాల అంచులలో ధ్యానిలా
తీవ్ర మోహలేమి వీధుల్లో నడివయసు గణికలా
తీరని కలల మలుపు దారుల్లో వైకల్య బాటసారిలా
ఘోరమైన దాష్టీక రాత్రిళ్ళలో
గూడు ఎరుక మర చిన గువ్వలా
పటా టోప దైనందినాల్లో
అంధభిక్షువులా
అలుపెరుగక తిరుగాడాడు
అతనే
ఒఖడిగా
వొంటరిగా
ద్రిమ్మరిగా
సంచారిలా
అనామకుడిలా
అనాధ ప్రేతంలా

మరేం పర్వాలేదు
ఈ హీన
చరితుడిని
గుర్థించవచ్చు తేలికగా

తొలి మలి సంజెల్లొ
సుదీర్ఘ సంతకం సలిపే
చాయే
ఆతని ఆనవాలు
............
యువకకి

వేకువ

ఇపుడు

నేనొక శవ పేటికను

అందున్న

నీ కోమల మార్మిక గుబురు కను రెప్పలు నిశ్చలం

సమతను పొదిమిన నీ నిర్మల హృదయ కవాటాలు నిశ్చలం

వైప్లవ్య గీతికలు ఆలపించిన నీ సుమధుర అధర విన్యాసాలు నిశ్చలం

మరో ప్రపంచాన్ని కాంక్షించిన  నీ నిమీలిత నేత్రాలు నిశ్చలం

ధిక్కారం నెలవున్న నీ ఊపిరి నిశ్చలం

నిశ్చలం నీ నిశ్చయం

అరుణారుణ రేఖల విత్తులు వెదజల్లిన నీ దోసిలి నిశ్చలం

రేచుక్కను గురిచూపిన నీ తర్జని నిశ్చలం

అధోజగతి అక్షౌహిణి కవాతు ప్రతిఫలించే నీ కరచాలనం నిశ్చలం

ఉక్కుపదఘట్టనల కిందా శిరమెత్తిన నీ దిటవు సంకల్పం  నిశ్చలం

మరణం కబళించలేని నీ అమరత్వం నిశ్చలం

నిశ్చలం నీ ప్రస్థానం

లంగరు త్రెంచి రేవుకు ఆవలి తీరం సూపిన నీ కౌగిలి నిశ్చలం

ద్రోహపు కత్తుల వంతెన దాటిన నీ అడుగులు నిశ్చలం

వ్యూహపు కదనపు బాటలు వేసిన నీ నడకలు నిశ్చలం

పదుగురి చరణాన పల్లవులు దిద్దిన నీ పాదగురుతులు నిశ్చలం

విద్యుత్తు ప్రసరించే నీ సమక్షం  నిశ్చలం

ఇప్పుడూ

నేనొక శ్మశాన వాటికను

అయినా

అందున్న

నీవూ,

నీ రగల్ పిడికిలీ,

దాల్చిన దాని కొడవలీ,

చూపుడు వేలుకు పరితపిస్తున్నతపంచా,

దాని కొన అంకురించిన మెరుపూ,

దాని తుషార బిందువు ముద్దిడిన

విత్తనం

మాత్రం

మరింత పదిలం

అది

మట్టి పొరల దాగిన నేటి నిశ్చలం

రేపటి మనిమూపున

అననుమతితో భళ్ళుమనే

మనందరి నిశ్చయం

...............................

కామ్రేడ్ వీరాస్వామికీ

పదైదు ఐదు పదైదు