అంతే

తెలివిగలవాడు
చదువుకున్నవాడు
తాగున్నాడు  అంతే!

మనసు మెట్లమీదే వదిలి
దేహాన్ని మోసుకొచ్చాడు

ఆకలి పగలుది
దాహార్తి యీ రాత్రిదీ
వొక్క గ్లాసు నీళ్ళు చాలు అంతే!

యీ చీకటి వాడి తప్పు కాదు
ఆకాశం చూడు
మబ్బులెట్లా ముసురుకున్నాయో

కొంగుతో
వొక్కసారి తుడువు చాలు
మళ్ళీ అద్దంలా మెరుస్తాడు అంతే!

-వాసిరెడ్డి శరత్ బాబు
   27 జూన్ 2012
 
(సందర్భం తెలియదు కానీ ఈ కవిత నా గురించే రాసానని శరత్ చెప్పాడు.)

కెంపాయనె

కెంపాయనె ఎల్లలు కెంపాయనె
కెంపాయనె ఎల్లలు కెంపాయనె

పగటేల పైడికంటి
పగడాల పాటల్ల
ఊరూ ఏరూ మురిసి కెంపాయనె

కెంపాయనె ఎల్లలు కెంపాయనె

బాలింత బుగ్గాన
నీరెండ గోరింట
సెలకా సెలమాలన్నీ కెంపాయనె

కెంపాయనె ఎల్లలు కెంపాయనె

గోధూళి వేళల్లో
గోవుల్ల దారుల్లో
నీడా నింగీ తోడై కెంపాయనె

కెంపాయనె ఎల్లలు కెంపాయనె

మాపటేల గోగురిచ్చా
సెట్టుల్ల ఆటా సూసీ
పైరు పాపిటలన్నీ కెంపాయనె

కెంపాయనె ఎల్లలు కెంపాయనె


( షార్ట్ ఫిల్మ్ " పీర్లు" కోసం నే రాసిన పాట)

wish

every  morning
into my mirror
i whisper,
-gimme wisdom
to
die will-

in the night
i murmer
-gimme strength
to
live well-

(16-06-12)

లేరు

మల్లెల్లా విరియలేరు
గువ్వల్లా గూడును  దిగుల్లేక వదల్లేరు
చెట్టుల్లా శాఖోపశాఖల్లో మరణం రెపరెపలాడలేరు
వేరుల్లా చిగురు పొదిమి విస్తరించలేరు
పైరుల్లాఎదని పచ్చపొడిపించలేరు
వీధుల్లా నడక నేర్పించలేరు
ఎవ్వరీ  శాపగ్రస్తులు

జవాబుల వాకబు తెలీని గదుల్లా అడుగు కాపాడుకోలేరు
సమాధాన పరచని సమాధుల్లా కేళి రేపలేరు
మాదిగల చర్చీల గంటల్లా రెండో రాకడ ఆశీర్వచనమీయలేరు
దూదేకుల దర్గాల్లా ప్రార్థన పలిఖించి దువా వచనమీయలేరు 
ఎవ్వరీ  ముక్త పగ గ్రస్తులు
ఎవరీ పాప భూయిష్టులు

పడి లేయలేరు అలల్లా
వడి సడి చేయలేరు గాలుల్లా
సడికీ తడికీ తాకిడికీ తెలిసీ తెలియనట్టుండలేరు తీరాల్లా
నిటారుగా నిశ్చలించలేరు కొండల్లా
స్తబ్దుగా ఫిర్యాదు సలుపలేరు లోయల్లా
వాలుగా చనలేరు వాగుల్లా 
ఎవ్వరీ  శోక తమస్సులు
ఎవరీ పందెంలో పారని పాచికలు

వాల లేరు గువ్వల్లా కొమ్మల్లో నడిరాతిరి
గుక్కతిప్పుకోలేరు పిల్లల్లా మలిరాతిరి
పగల్లేరు మొక్క మొనన పత్తిలా కాసేప్పటి రాతిరి
ఎగరలేరు ద్రిమ్మరి కొంగల్లా తెలవారి
వెలివాడల నుడికారపు బతుకు బాటల డొంకదారులు
కనలేరు... కని చనలేరు... చని... పోలేరు
ఎవ్వరీ మరీచిక వీచికలు
ఎవరీ అధోముఖ సూచికలు