అర పుష్కరం... లేదా అనంతరం

 1

ఆమె లేదా నేను  

నా కన్నులు 

గువ్వల్లా 

చిగురునుంచి వేరుదాకా 

నీ మేని మానుపై 

వాలడమా 

నా మోహ చిరునామా 

2

నేను  లేదా ఆమె

పెదాలు 

మధురోహల్లో 

చిప్పిల్లి 

మేని వనాల్లో 

దారి తప్పిన 

లేత పిచ్చుకల్లా 

దిక్కుతోచక 

విహరించడమా

కాంక్ష ఆనవాలు 

3

ఆమె లేనీ  నేను  

వేళ్ళమొనలు 

మత్తిలి 

చేరగిలి 

వొడిసీ 

పర్యంతాంతాన్ని 

పర్యటించే 

ప్రతి స్వేద బిందువుల 

మెరుపులని 

చెరిపేస్తూ

కలిపేస్తూ 

స్పర్శ 

గ్రోలడమా 

ప్రేమకు  

అందని 

వరాలు 

4

నేను  లేకే  ఆమె

మోహ చిరునామాలు 

ఆనవాలు లేని కాంక్షలూ 

కురవని వర్షాలూ 

ఇరువురి 

వరాలు 

అవీ 

అనాధలు 

యింకా 

5

ఆమె లేకా  నేనే 

కన్నులు 

మాను కోసం 

రెక్కలుచాస్తున్న గువ్వలే 

యింకా 

6

నేనూ ... ఆమే

నా పెదాలు 

మేనివనాల్లో 

గూడింకా చేరని 

పిచ్చుకుల రాతిరి చూపులు 

7

ఆమే ... నేనూ... లేనీ ... లేమీ

వేలి మొనలు 

దేహ చిత్రాంతాలకూ 

అర్రులు చాస్తున్న 

విచ్చిన కుంచెలే 

యీ నేటికీ 

(November 24, 2015, Manikonda)